बुटवल
भदौ १२ –
घुस रकम सहित बुटवलका खरिदार र लेखापढी व्यवसायी र काठमाण्डौका लेखापाल र सहायक प्रधानाध्यापक पक्राउ परेका छन् ।
मालपोत कार्यालय बुटवलका खरिदार जिवनाथ पाण्डे र लेखापढी व्यवसायी कमल पाण्डे १ लाख २० हजार रुपैँया घुस लिँदालिँदै पक्राउ परेका हुन् ।
जग्गा नामसारी र लालपुर्जा दिने काम सजिलो बनाइदिने भन्दै सेवाग्राहीसँग १ लाख २० हजार रुपैयाँ घुस लिइरहेको बेला
खरिदार पाण्डे र लेखापढी व्यवसायी पाण्डेलाई अख्तियार दुरूपयोग अनुसन्धान आयोगको कार्यालय, बुटवलको टोलीले पक्राउ गरेको हो ।
उनीहरुमाथि थप अनुसन्धान भैरहेको अख्तियारले जनाएको छ ।
यस्तै चावहिल काठमाण्डौको एक बिद्यालयका लेखापाल र सहायक प्रधानाध्यापक डेढ लाख रुपैयाँ घुससहित समातिएका छन् ।
विद्यालयमा चमेना गृहको ठेक्का दिने क्रममा लेखापाल बद्रीप्रसाद पराजुली र सहायक प्रधानाध्यापक विक्रम बिसीले १ लाख ५० हजार रुपैयाँ घुस लिइरहेको बेलामा
अख्तियार दुरुपयोग अनुसन्धान आयोगको टोलीले पक्राउ गरेको हो ।
उनीहरुमाथि पनि थप अनुसन्धान भैरहेको छ ।
