गुल्मी
मंसिर १३ – लैङगिक हिंसा बिरुद्धको १६ दिने अभियान देशैभर चलिरहेकोे छ । पछिल्लो समय हिसांका घटनाहरु बढेका कारण समाजमा जनचेतना फैलाउने उद्धेश्यले प्रत्येक वर्ष नोभेम्बर २५ देखि डिसेम्बर १० सम्म देशैभर बिशेष अभियान सन्चालन गरिदै आइएको छ । यसै अवसरमा गुल्मीको मालिका गाउँपालिकाले लैङ्गिक हिंसा विरुद्धको १६ दिने अभियान अन्तर्गत पहिलो दिन मालिका गाउँपालिका १ नेटामा छलफल कार्यक्रम सम्पन्न गरेको छ ।
गाउँ पालिकाले पालिकामा रहेका ८ वटै वडामा अभियान सञ्चालन गर्ने मालिका गाउँ पालिकाका उपाध्यक्ष देवा अर्यालले जानकारी दिनुभयो। अर्यालका अनुसार छलफलमा सहभागी महिलाहरूले मदिरा सेवनले हिंसा बढाएको बताएका थिए ।उनीहरूले मदिरामुक्त वडाका लागि गाउँपालिकालाई पहल गर्न आग्रह समेत गरेका छन् । सोही वडामा महिलाहरू घरभित्रै दविएर बस्नुपर्ने ,छोरा र छोरीमा समान व्यवहार नगर्ने लगायतका विषयमा छलफल भएको थियो ।
मालिका गाउँपालिकाका अध्यक्ष रित बहादुर थापाले हिंसा न्यूनीकरण गर्न स्थानीय महिला जागरुप हुनुपर्ने उल्लेख गरे । बालविवाह पहिलो समस्या रहेको बताउँदै बाल विवाह रोक्न सबै लाग्नुपर्ने थापाको भनाई छ । यस्तै मालिका गाउँपालिका उपाध्यक्ष एवं कार्यक्रमका संयोजक देवा अर्यालले लैगिंक हिंसा कसैले नगर्ने र नसहने हो भने हिंसा न्यूनीकरण भएर जाने बताइन् । न्यायिक समितिको संयोजक समेत रहेकी उनले गाउँमा हिंसा भए न्यायका लागि गाउँपालिका आउन कार्यक्रमका सहभागीलाई आग्रह गरेकी छन् ।
अभियान प्रत्येक वडामा ८ दिन सम्म चल्ने पालिकाले जनाएको छ ।
