बाग्लुङ
मंसिर २२ – बाग्लुङ जिप दुर्घटनामा घाइते एक जनाको निधन भएसगै ज्यान गुमाउनेको संख्या १६ पुगेको छ।
गुल्मीको इस्मा गाउँपालिका ४ दोहोलीबाट बागलुङको निसिखोला गाउँपालिका वायोखोलामा कुल पूजाको लागि हिँडेको ग १ ज ५२१९ नम्बरको जिप मंगलबार दुर्घटनामा परेको थियो। दुर्घटनामा परि १५ जनाको घटनास्थलमै मृत्यु भएको थियो। मंगलबार भएको दुर्घटनामा परि घाइते भएकी इस्मा गाउँपालिका ४ दोहोलीका २४ वर्षीया निमा केसीको उपचारका क्रममा शनिबार निधन भएपछि ज्यान गुमाउनेको संख्या १६ पुगेको हो।
निमालाई उपचारका लागि मंगलबार नै हेलिकप्टरबाट काठमाडौं लगिएको थियो। टाउको र शरीरका विभिन्न भागमा गम्भीर चोट लागेकी उनको शनिबार काठमाडौंस्थित शिक्षण अस्पतालमा मृत्यु भएको परिवार स्रोतले जनाएको छ। जसमध्ये इस्मा गाउँपालिका ४ दोहोलीका ६५ वर्षीय धनबहादुर कार्कीको शव अर्को दिन भेटिएको थियो। दुर्घटनामा परेकामध्ये १० जनाको सोही दिन नै इस्मा गाउँपालिका ५ रजस्थल हुलाकेमा सामूहिक दाहसंस्कार गरिएको थियो।
घाइते भएका चार वर्षीय हिमाल कार्की र नवलपरासी वर्दघाट नगरपालिका २ का २२ वर्षीय जीवन कार्कीको भने उपचार भइरहेको छ।
