प्रेम सुनार
गुल्मी, चैत्र–४ – गुल्मीको मदाने गाउँपालिकाले आर्थिक अभावका कारण उच्च शिक्षाको संघारमा पुग्न नसकेका महिलाहरुलाई उच्च शिक्षाको पहुँच सम्म पुराउने उद्धेश्य अनुरुप जिल्ला मै उदाहरणीय कार्यको थालनी गरेको छ ।
उसले यसै शैक्षिक बर्ष देखि लागु हुने गरि छोरी बुहारी उच्च शिक्षा कार्यक्रम लागु गरेर महिलाहरुको पक्षमा उदाहरणीय कार्य गरेको हो ।त्यस गाउँपालिकाले सम्पुर्ण खर्च ब्यहोर्ने गरि गाउँपालिकाकै पुर्कोदह स्थित जनज्योति क्याम्पसमा छोरी बुहारीहरुलाई यसै शैक्षिक सत्र देखि बिएड प्रथम बर्षमा भर्ना गराउन सुरु गरेको छ । यस कार्यलाई गुल्मी क्षेत्र नम्वर २ का सांसद तथा पुर्व मन्त्री गोकर्णराज बिष्टले समेत उदाहरणीय कार्य भन्दै आफ्नो निर्वाचन क्षेत्रका सबै स्थानिय तहमा पनि मदानेले झै छोरी बुहारी उच्च शिक्षा कार्यक्रम लागु गर्न गराउन नेकपाका अगुवा कार्यकर्तालाई निर्देशन दिएका छन् । ‘आर्थिक अभावका कारण विपन्न बर्गका तमाम छोरी बुहारीहरुले उच्च शिक्षा हाँसिल गर्न सकिरहेका छैनन्,त्यसलाई मध्ये नजर गर्दै मदाने गाउँपालिकाले नमुना कार्यक्रम सञ्चालन गरेको छ , उसले झै क्षेत्र नम्वर २ का सबै पालिकाहरुले छोरी बुहारी उच्च शिक्षा कार्यक्रम लागु गर्नुहोस्’– भेला भएका क्षेत्र नम्वर २ का नेकपाबाट विजयी जनप्रतिनिधी र कार्यकर्ताहरुलाई सम्वोधन गर्दै सांसद बिष्टले भने’– पछाडी परेका महिला र वर्ग समुदायको उत्थानमा जुट्नु नै नेकपाका कार्यकर्ताहरुको मुख्य जिम्मेवारी हो । ’
मदाने गाउँपालिका अध्यक्ष दानबहादुर केसीले गत बर्ष गाउँ गाउँमा बुझ्दै जाँदा पढ्ने ईच्छा हुँदाहुँदै पनि आर्थिक अभावका कारण बिशेष गरि दलित समुदाय र अन्य विपन्न बर्गका छोरी बुहारीहरु उच्च शिक्षा हाँसिल गर्न बाट बञ्चित भएको पाईए पछि छोरी बुहारी उच्च शिक्षा कार्यक्रम लागु गरिएको बताए । उनले यस प्रथम बर्ष देखि चौथो बर्ष सम्म छोरी बुहारीहरुलाई निशुल्क अध्यान गराईने जानकारी दिए ।महिलाहरुलाई उच्च शिक्षा हाँसिल गराउन गाउँपालिकाले नै अगुवाई गर्नु पर्नेमा त्यस गाउँपालिकाकी उपाध्यक्ष सरिता खड्काको पनि जोड रहेको बताईन्छ । त्यस गाउँपालिकाका प्रमुख प्रशासकिय अधिकृत सुरेश भण्डारीले सबै जनप्रतिनिधीहरुको जोड रहेकोले यस आर्थिक बर्ष देखि बिएड प्रथम बर्षको भर्ना सुरु गरिएको र आगमी बर्ष देखि कक्षा ११ र १२ मा पनि गाउँपालिकाले छोरी बुहारीहरुलाई निशुल्क पढउने लक्ष्य लिएको बताए ।‘कक्षा १० सम्म केन्द्र सरकारले नै निशुल्क शिक्षा दिएको छ , कक्षा ११ देखि उच्च शिक्षा सम्म गाउँपालिकाले निशुल्क पढाउन लागेको हो, प्रमुख प्रशासकिय अधिकृत भण्डारीले भने–‘यस कार्यक्रम पनि लक्षित बर्ग केन्द्रित हो, गाउँपालिका अध्यक्षज्युको जोड लक्षित बर्गको उत्थानमा रहेकोले अन्य यस्ता थुप्रै कार्यक्रम पनि सञ्चालन गरिएको छ जसको सकरात्मक परिणाम पनि देखा पर्न थालेका छन् । उनले असुरक्षित अब्यवस्थित दलित समुदायको वस्ती सारेर एकिकृत नमुना वस्ती निर्माण सुरु गरिएको र जेठ १५ गते गणतन्त्र दिवसको अवसरमा हस्तान्तरण गर्न लागिएको जानकारी समेत दिए ।
