जेठ १३
प्रधानमन्त्री केपी शर्मा ओलीले आज साँझ सर्वदलीय बैठक बोलाएका छन् । बैठक साँझ ५ बजे प्रधानमन्त्री निवास बालुवाटारमा बोलाइएको प्रधानमन्त्रीका प्रेस सल्लाहकार सूर्य थापाले जानकारी दिए ।
सरकारले नेपालको नयाँ नक्सा जारी गरेपछि संविधान संशोधन गर्नुपर्ने भएकाले सोही विषयमा दलहरुसँग छलफल गर्न प्रधानमन्त्री ओलीले बैठक बोलाएको ओली निकट नेकपाका एक नेताले जानकारी दिए ।
संविधान संशोधनको लागि संसदमा संशोधन प्रस्ताव दर्ता गरिसकेको छ । तर कतिपय दलले अन्य दलसँग छलफल नै नगरी सरकारले आफूखुसी संसोधन प्रस्ताव दर्ता गराएको भन्दै आलोचना गरेपछि प्रधानमन्त्रीले बैठक बोलाएका हुन् ।
जनता समाजवादी पार्टी नेताहरुले भने आफुहरुले पहिलेदेखि उठाएको मागसहित एकैपटक संविधान संशोधन गर्नुपर्ने बताउन थालेका छन् । एक नेताले आफूहरुको माग पनि छलफलका क्रममा प्रधानमन्त्रीसँग राख्ने बताए ।
