गुल्मी ,
साउन १५- स्थानीय तहको निर्वाचन भएको तीन वर्ष पुग्दासमेत गाउँपालिका केन्द्रबारे विवाद कायमै छ। गुल्मीको इश्मा गाउँपालिकाले स्थानीय तहको निर्वाचन भएको तीन वर्ष पूरा हुँदासमेत गाउँपालिकाको केन्द्रको बिबाद मिलाउन सकेको छैन। जिल्लाका २ नगरपालिका र १० वटा गाउँपालिकाहरुमध्ये गाउँ र नगरको केन्द्र टुंगो लाग्न बाँकी इश्माको मात्रै रहेको छ। पटक पटक नेपाल कम्युनिष्ट पार्टी र गाउँपालिकाका अध्यक्षबीच केन्द्र विवाद समाधान गर्ने विषयमा छलफल भए पनि समाधान भने हुन सकेको छैन। गाउँपालिकाका अध्यक्ष लक्ष्मण विष्टले केन्द्रको विवाद समाधानका लागि निरन्तर छलफल भइरहेको दाबी गरे। उनले कार्यपालिकाको बैठकमा समेत पटक पटक छलफल गर्दा समान धारणा र एकरुपता हुन नसकेकाले समस्या भएको बताए। चाँपटारीबाट हाल अस्थायी रुपमा गाउँपालिकाले सेवा प्रवाह गरेको छ। केन्द्रको टुंगो नलागेकाले स्थायी संरचना बन्न सकेको छैन। यता, नेपाली कांग्रेसले गाउँपालिकाको नेतृत्व नै असक्षम भएको आरोप लगाएको छ । कांग्रेसका जिल्ला सचिव खिलध्वज पन्थीले गाउँपालिकाको नेतृत्व नै असक्ष म भएको आरोप लगाएका हुन । कार्यपालिका, गाउँसभामा सबै नेकपाको हालीमुहाली हुँदासमेत केन्द्रको विवाद टुंगो लगाउन नसक्नु नेतृत्व नै अक्षम भएको बताएका छन्। नेपाली कांग्रेसको कार्यपालिकामा एक जना मात्रै सदस्य रहेको र सबै नेकपाको हालीमुहाली हुँदासमेत केही गर्न नसक्नु दुखद भएको पन्थीले बताए।
