गुल्मी / असोज १ – गुल्मीमा कोरोना परिक्षण गर्ने पीसीआर मेसिनको बिहिबार उद्घाटन गरिएको छ ।
मेसिनको परराष्ट्रमन्त्री प्रदिप कुमार ज्ञवालीले उद्घाटन गर्नुभएको हो । परराष्ट्रमन्त्री ज्ञवालीको पहलमा रेसुङ्गा नगरपालीका वडा नम्बर ९, उपल्लो तम्घासमा पीसीआर जाँच ल्याव स्थापना भएको हो । ल्यावका लागि जिल्लाका १२ वटै स्थानीय तहले ५ लाखका दरले संकलन गर्ने प्रतिवद्धता जनाएका छन । जिल्लामा कोरोना संक्रमितको पहिचान गरी कोरोना समुदाय स्तरमा फैलिन नदिनको लागि पीसीआर मेसिन संचालनमा ल्याउन लागिएको हो ।
यसअघि पनि गुल्मीमा पिसिआर मेसिन ल्याएर मन्त्री ज्ञवालीले नै साउन २ गते रेसुङ्गा नगरपालिकाका मेयर डिल्लिराज भुसाललाई हस्तान्तरण गर्नुभएको थियो । तर बीचमा केही प्राविधिक समस्या देखिएपछि मर्मतको लागि काठमाडौ लगिएको थियो ।अहिले काठमाडौबाट उक्त मेसिनको सट्टा नयाँ मेसिन ल्याइएको छ ।
बिहिबार ल्याबको उद्घाटन गरिएपनि नियमित संचालनमा आउन भने अझै केहि समय लाग्नेछ । गुल्मीमै कोरोना जाँच गर्ने पीसीआर मेसिनको सुरुवात भएपछि पीसीआर रिपोर्टको प्रतिक्षामा बस्नुपर्ने बाध्यताको अन्त्य हुने भएको छ ।
