असौज १९
गुल्मीको कालीगण्डकी करिडोर अन्तर्गतको रिडी(रुद्धबेनी सडकखण्ड एक हप्तादेखि पहिरोका कारण अवरुद्ध भएको छ। सडकखण्डको बिष्णुपन्जरमा माथिबाट निरन्तर रुपमा पहिरो खसिरहेकाले सडक अवरुद्ध भएको जिल्ला प्रहरी कार्यालय गुल्मीका प्रहरी नायव उपरीक्षक केदारराज पन्तले जानकारी दिए।
सो सडक अवरुद्ध हुँदा सत्यवती, कालीगण्डकी, चन्द्रकोट गाउँपालिकासँगै बाग्लुङसम्म जाने सवारीसाधनका चालक र यात्रुहरूले सास्ती भोग्नु परेको छ। यता कालीगण्डकी करिडोर गैडाकोट, राम्दी, मालढुङगा सडक योजना पाल्पाका योजना प्रमुख नरेन्द्र सुवेदीले पहिरो झर्ने क्रम नरोकिएकाले सडक खुलाउन समय लागेको जानकारी दिए।
हीजो साँझबाट पहिरो झर्ने क्रम रोकिएकाले २ वटा मेसिनहरू पहिरो पन्छाउनका लागि प्रयोग भइरहेको उनले दाबी गरे। बीचमा केही समस्या आइ नपरे भोली साँझसम्म सडक खुलाउन सकिने सुवेदीले जानकारी दिएका छन्। सुवेदीका अनुसार एम्बुलेन्स र साना गाडीहरूका लागि वाइपासको व्यवस्था गरेको र अन्य ठूला गाडीहरूका लागि तम्घास इन्द्रेगौंडा सडकको प्रयोग भइरहेको छ।
