१२ पुस,
सर्लाहीको दक्षिण–पश्चिम क्षेत्रस्थित बागमती खोला छेउको बरहथवा नगरपालिका–२, हजरियामा ठेकेदारको लापरवाहीका कारण सडकको कालोपत्रे दुई दिनमै उप्किएपछि स्थानीय रुष्ट बनेका छन् ।
बरहथवा बजारहुँदै जाने सडक अन्तर्गत हजरियाको पन्चायन मन्दिरदेखि ईलाका प्रहरी कार्यालय हजरिया अगाडि सम्मको सडक कालोपत्रे हुनासाथ उप्किएको हो । सडकमा वुधवार मात्रै गरिएको कालोपत्रे कामै नलाग्ने अवस्थामा पुगिसकेको छ ।
सो नगरपालिकाको वडा नं। २ का वडाध्यक्ष यज्ञबहादुर खड्काले आफूहरुले नगर्न भन्दा पनि ठेकेदारले जवरजस्ती गरेको कालोपत्रे काम पूरा हुन नपाउँदै उप्किएको बताउनु भयो । ‘हामीले प्रहरी लगाएर पटक–पटक रोक्दा समेत ठेकेदारले बलजफ्ती कालोपत्रे गरे, त्यसैको परिमाण स्वरुप अहिले गुणस्तरहीन कालोपत्रे उक्किसकेको छ, वडाध्यक्ष खड्काले भन्नुभयो ।’
एम।एस।के। लाईट कन्ष्ट्रक्सनले भ्याटसहित ६५ लाख रुपैयाँमा सडक कालोपत्रेको ठेक्का सकार गरेको छ । यो बरहथवा नगरपालिकाकै बजेट हो । जसमध्ये अहिलेसम्म ठेकेदारलाई २८ लाख रुपैयाँ भुक्तानि भइसकेको बरहथवा नगरपालिकाको योजना शाखाले जनाएको छ ।
नगरको योजना शाखाका प्रमुख एवं नगरपालिकाका सूचना अधिकारी कमलप्रसाद पौडेलले हजरियाको सडकमा गुणस्तरहिन कालोपत्रे भएको गुनासो व्यापक मात्रामा आएको बताउनु भयो । बरहथवा नगरपालिकाकी उपमेयर सीतादेवी माझीले समेत गुणस्तरहीन काम भएको र प्राविधिकले भने अनुसार गुणस्तरीय काम नभएसम्म बाँकी भुक्तानि नगरिने बताउनु भयोा ।
सडक कालोपत्रेको जिम्मा पाएका ठेकेदार सुरेश कार्कीले भने कालोपत्रेको काम निर्माणकै चरणमा रहेको दावी गर्नुभयो । उहाँले ‘काम पूरा भएकै छैन्, अहिले पनि जारी छ, हस्तान्तरण नहुन्जेल हामी बनाइ हाल्छौँ, अनि यसमा ठेकेदारले बद्मासी ग¥र्यो भन्नै पदैन्,’ भन्नुभयो, ‘बनाइरहेको सडकमा क्षमता भन्दा बढी लोडका टिफर लगायत अन्य सवारी गुडाएपछि भत्की हाल्छ ।’ उहाँले तापक्रम कम भएको बेला कालोपत्रे गरेर भने गल्ती भएको स्वीकार गर्नुभयो ।
