माघ २२
सडक डिभिजन कार्यालय पाल्पाले सडक क्षेत्राधिकार भित्र पर्ने संरचना ७ दिनभित्र हटाउन उर्दी जारी गरेको छ ।
सिद्धार्थ राजमार्ग र तानसेन–तम्घास सडकखण्डमा सडक क्षेत्राधिकारभित्र पर्ने जग्गामा बनाइएका संरचना ७ दिनभित्र हटाउन सम्बन्धित व्यक्तिलाई सडक डिभिजन कार्यालयले बुधबार सूचना जारी गरेको हो ।
सडक विभागको स्वीकृतिबिनै राजमार्ग (सिद्धार्थ राजमार्ग) तथा सहायक मार्ग (तानसेन–रिडी सडकखण्ड) मा बनाइएका संरचनाले सडक आवागमनमा बाधा पुगेको भन्दै तत्काल त्यस्ता संरचना हटाउन सडक कार्यालयले भनेको छ ।
सडकसँग जोडिने प्रवेशमार्ग, घरटहरा, होर्डिङ्बोर्ड, आइल्याण्ड, शालिक, यात्रु प्रतिक्षालय, देवालय, मठ मन्दिर तत्काल हटाउन सडकको सूचनामा उल्लेख छ । यस्तै पेट्रोलरडिजेल पम्प, ग्यास फिलिङ् स्टेसन तथा डम्पिङ् गरिएका निर्माण सामग्री समेत हटाउन सडक डिभिजन कार्यालयले जारी गरेको सूचनामा उल्लेख छ ।
कार्यालयले सार्वजनिक सडक ऐन २०३१ को दफा अनुसार यस्ता संरचना स्वीकृतिबिना बनाउन नपाउने निषेध गरेको छ । उसले सडक सिमाभित्र पर्ने जग्गाका संरचना ७ दिनभित्र हटाउन सबैमा सूचित गरेको छ ।
कोही कसैले संरचना नहटाए सार्वजनिक सडक ऐन अनुसार कारबाही प्रक्रिया अगाडि बढाइने सडक डिभिजन कार्यालय पाल्पाका सूचना अधिकारी शिवु खत्रीले बताउनुभयो ।
उहाँले सिद्धार्थ राजमार्गको दाँया बाँया २५–२५ मीटर र तानसेन–रिडी सडकखण्डको सडकदेखि १५–१५ मीटर सडकको क्षेत्राधिकार पर्ने बताउनुभयो ।
