तिलाचन पाण्डे/गुल्मी
जिल्लाको सत्यवती गाउँपालिका वडा नम्बर २ को चेहमी देखी सोही वडाको स्वास्थ्य चौकीसम्म जाने गोरेटो बाटो प्रधानमन्त्री रोजगारका कामदारहरुले निर्माण गरेका छन् ।मुल सडकदेखी स्वास्थ्य चौकीसम्म जाने करिब १ किलोमिटर गोरेटो बाटो १।५ मिटर चौडा गर्ने गरी १५ जना कामदारहरु खटाइएको वडा सदस्य खड्गबीर थापाले जानकारी दिनुभयो ।जनताको स्वास्थ्य सङग दैनिकरुपमा जोडिएको गोरेटो बाटो केही अप्ठेरो भएकाले सहज रुपमा पैदल यात्रा गर्न सकियोस भनेर गोरेटो बाटो निर्माणमा कामदार लगाइएको उहाँको दाबी छ ।यस्तै सोही वडाको थुम्कामा पनि गोरेटो बाटो निर्माण गर्नका लागि १० जना कामदारहरु खटाइएको छ । दैनिक रुपमा स्थानीयहरु घाँस दाउरा गर्न जाने गोरेटो बाटोलाई चौडा गर्दा सहज हुने भन्दै सो बाटो चौडा गर्न कामदारहरु खटाइएको थापाले बताउनुभयो ।
पालिका भित्र गोरेटो बाटो निर्माण,नाली, पुल तथा कुलाहरु सफा गर्ने गरी काममा खटाइएको गाउँपालिकाका अध्यक्ष पारीश्वर ढकालले जानकारी दिनुभयो ।
यस बर्ष समयमै योजनाहरु छनोट गर्न सकिएकाले कार्यक्रमलाई प्रभाबारी बनाउने गरी आफू लागेको उहाँको दाबी छ ।पालिका भित्रका बिभिन्न ५७ वटा योजनाहरुमा २८६ जना कामदारहरुले काम गरेको रोजगार संयोजक सुभाष आचार्यले जानकारी दिनुभयो ।पालिका भित्रका बेरोजगार एक हजार २६० जनाले आबेदन दिएकोमा प्राथमिकताका आधारमा २६० जना छनोट गरिएको आचार्यले बताउनुभयो ।कामदारहरुलाई दैनिक ५७७ का दरले १०० दिन बराबरको पारिश्रमीक उनीहरुको बैक खातामा जम्मा गरिदिने गाउँपालिकाले जनाएको छ ।
