नक्कली भुटानी शरणार्थी प्रकरणमा बालकृष्ण खाण अन्यायमा परे ।
मंसिर १३
नक्कली भुटानी शरणार्थी प्रकरणमा पक्राउ परेका नेपाली कांग्रेसका केन्द्रीय सदस्य एवं पूर्व गृहमन्त्री बालकृष्ण खाण अन्यायमा परेको दाबी कांग्रेस नेताहरुले गरेका छन् ।
खाणको गृह जिल्ला रुपन्देहीमा मंगलबार कांग्रेसको प्रथम जिल्ला सम्मेलन उदघाटन सत्रमा बोल्दै कांग्रेस नेताहरूले खाण निर्दोष रहेको जिकिर गरे । उनीहरूले खाणलाई विभिन्न तत्वले फसाएको आरोप लगाउँदै रिहाइका लागि पार्टीले पहल गर्नुपर्ने बताए ।
रुपन्देही क्षेत्र नम्बर ३ का सभापति सुशील गुरुङले बालकृष्णको रिहाइका लागि पार्टीको केन्द्रीय कार्यसमितिले देखिने गरी पहल गर्नुपर्ने बताए ।केन्द्रीय सदस्य चन्द्र बहादुर केसीले बालकृष्ण खाण निर्दोष रहेको जिकिर गर्दै उनको रिहाइका लागि सभापति शेर बहादुर देउवाले पहल गर्नुपर्नेमा जोड दिए ।
नेपाली कांग्रेसका सहमहामन्त्री किशोर सिंह राठौरले बालकृष्ण खाणलाई सर्वोच्च अदालतले दोषी ठहर नगर्दासम्म उनी निर्दोष हुने बताए । खाणलाई कुनै तत्वले फसाएको भन्दै उनले त्यस्ता तत्वको पनि हिसाब किताब पार्टीले गर्ने चेतावनी दिए ।कार्यक्रममा नेपाली कांग्रेसका सभापति शेरबहादुर देउवाले पनि खाणले न्याय पाउने बताए ।
बालकृष्ण खाणसहित नक्कली भुटानी शरणार्थी प्रकरणमा पूर्व मन्त्री टोप बहादुर रायमाझी, गृह सचिव टेक नारायण पाण्डे लगायत अहिले जेलमा छन् । रुपन्देहीको तिलोत्तमा नगरपालिका निवासी खाण पटकपटक मन्त्री बनेका नेता हुन् ।
