स्रष्टाको अनुमति बिना म्युजिक ट्रयाक प्रयोग गरे दण्ड जरिवाना र सजाय हुने ।
मंसिर १९
राष्ट्रिय लोक तथा दोहोरीगीत प्रतिष्ठानले स्वदेश तथा विदेशका सांगीतिक तथा सांस्कृतिक कार्यक्रममा स्रष्टाको अनुमति बिना गीतको म्युजिक ट्रयाक प्रयोग गरिएको भन्दै ध्यानाकर्षण गरेको छ ।
प्रतिष्ठानले आज मंगलबार विज्ञप्ति जारी गर्दै गीतको धनी, सर्जक तथा प्रस्तोता, उत्पादनको समझदारीमा लिखित अनुमति प्रत्यायोजन गरेको खण्डमा मात्र प्रयोग गर्न आग्रह गरेको छ ।अध्यक्ष रीता थापामगरद्वारा हस्ताक्षरित विज्ञप्तिमा गीतको म्युजिक ट्रयाक अनधिकृत रुपमा व्यावसायिक प्रयोग गरिएको गुनासो आएपछि उक्त कार्य नगर्न र नगराउन आग्रह गरिएको हो ।
स्रष्टाको अनुमति बिना प्रयोग गरिएको पाइएमा प्रचलित प्रतिलिपि अधिकार ऐन २०५९ र नियमावली २०६१ को व्यवस्थाअनुसार सम्बन्धित अधिकारको धनीको माग बमोजिम असुलउपर, जरिवाना र दण्ड सजाय हुन सक्ने जनाइएको छ ।
