लुम्बिनी प्रदेशमा अत्याधिक घर परिवार कृषिमा आबद्ध रहेको नतिजा सार्वजनिक ।
मंसिर २२
लुम्बिनी प्रदेशमा ६७ प्रतिशत घरपरिवार कृषिमा आबद्ध रहेको पाइएको छ ।
राष्ट्रिय तथ्याङ्क कार्यालयले हिजो बुटवलमा सार्वजनिक गरेको राष्ट्रिय कृषिगणना २०७८ को प्रदेशस्तरीय नतिजा सार्वजनिक कार्यक्रममा नेपालमा कुल घरपरिवार ४१ लाख ३० हजार ७८९ घरपरिवार मध्य २२ लाख १८ हजार ४ सय १० घरपरिवार कृषक परिवार रहेको जनाएको हो ।
जुन कुल घर परिवारको ६२ प्रतिशत हो । कृषि गणनाअनुसार लुम्बिनी प्रदेशमा ७ लाख ६५ हजार ९२ घरपरिवारले ४ लाख २६ हजार ६ सय १४ हेक्टर क्षेत्रफलमा कृषि गरेको तथ्याङ्क कार्यालयकाले नतिजा सार्वजनिक गरेको छ ।
साथै कार्यालयको तथ्यांकअनुसार प्रदेशभरि मुख्य कृषक पुरुष ६४.५ प्रतिशत रहेका छन् भने महिला ३५.५ प्रतिशत छन् । हाल नेपालमा कुल सिंचित क्षेत्रफल ५४.५ प्रतिशत रहेकामा लुम्बिनी प्रदेशमा ५६.७ प्रतिशत क्षेत्रफल रहेको पाइएको छ ।
राष्ट्रिय कृषि गणना २०७८ अनुसार १० वर्षको अवधिमा पशुपालन गर्ने कृषक परिवारको संख्या भने बढेको देखिएको छ । ३३ लाख ५३ हजार ८६७ पशुपालन गर्ने कृषको संख्या बढेर अहिले ३४ लाख ५ हजार १४ पगेको छ । लुम्बिनी प्रदेशमा ६६.३ प्रतिशत कृषक परिवारको आम्दानीको मुख्य स्रोत कृषि कार्य रहेको पाइएको छ भने देशभर ७०.४ प्रतिशत कृषक परिवारको आम्दानीको स्रोत कृषि कार्य रहेको तथ्याङ्कमा उल्लेख गरिएको छ ।
