माघ ६
गुल्मीको इश्मा गाउँपालिकाले विद्यालयमा नर्स कार्यक्रम सञ्चालन गरेको छ ।
विद्यार्थीहरुको स्वास्थ्य चेकजाँच र स्वास्थ्य सम्बन्धी समस्याको समाधान गर्नका लागि विद्यालयमा नर्स कार्यक्रम सञ्चालन गरिएको इश्मा गाउँपालिकाले जनाएको छ ।
गाउँपालिका भित्र रहेका ७ वटा माध्यमिक विद्यालयमा स्टाप नर्सको नेतृत्वमा प्रत्येक महिना स्वास्थ्यकर्मी गई स्वास्थ्य चेकजाँच गर्ने र स्वास्थ्य सम्बन्धी शिक्षा प्रदान गर्ने गरेको उपाध्यक्ष पार्वती कुँवरले जानकारी दिनुभयो ।
अहिलेका किशोरीहरुले खानपान लगायत महिनावारी हुँदा स्वास्थ्यको उचित ख्याल नगर्ने र दीर्घकालीन समस्याहरु आउन सक्ने भएकाले त्यसको न्यूनिकरण गर्न यो कार्यक्रम सञ्चालन गरिएको उहाँको भनाइ छ ।
किशोरीहरु महिनावारी हुँदा सेनेटरी प्याड कसरी प्रयोग गर्ने , कति दिनसम्म प्रयोग गर्ने र महिनावारीका समयमा स्वास्थ्यको उचित ख्याल नगर्दा पाठेघरमा समेत समस्या आउन सक्ने भएकाले विद्यालयमा स्टाप नर्स कार्यक्रम गरिएको कुँवरले बताउनुभयो ।
किशोरीहरुमा वढी केन्द्रित भए पनि यस कार्यक्रममा किशोरहरुको पनि स्वास्थ्य परीक्षण गरिने गाउँपालिकाको स्वास्थ्य शाखाले जनाएको छ ।
गाउँपालिकाको स्वास्थ्य शाखाबाट स्टाप नर्सको नेतृत्वमा खटिने र सम्वन्धित वडाका स्वास्थ्यकर्मीहरु यस कार्यक्रममा सहभागी हुने गरी ब्यवस्था गरिएको छ । अहिले माध्यमिक तहलाई लक्षित गरेर यो कार्यक्रम सञ्चालन गरिएपनि आधारभूत तहमा पनि विस्तार गर्दै लैजाने तयारी गरेको उपायक्ष कुँवरले बताउनुभयो ।
अहिले परीक्षणको रुपमा भएकाले कुनै बजेटको ब्यवस्था नगरिएको र प्रभावकारीताका आधारमा कार्यक्रम तथा बजेटको ब्यवस्था गर्ने कुँवरले बताउनुभयो ।
विद्यालयमा स्टाप नर्स कार्यक्रमले स्वास्थ्यका बारेमा धेरै जान्ने र बुझने अवसर प्राप्त भएकाले यस कार्यक्रमलाई निरन्तरता दिन किशोरीहरुले आग्रह गरेका छन् ।
विद्यालयमा लागुऔषध , कुलत र साइवर क्राइम सम्बन्धी सचेतनाका कार्यक्रमलाई जोडन स्थानीयहरुले स्थानीय सरकारलाई आग्रह गरेका छन् ।
