असार २८
नारायणगढ–मुग्लिन सडकखण्डमा पहिरोले दुई वटा बस बगाउदा ६० बढी यात्रु सम्पर्क बिहिन भएका छन ।
पहिरोले दुई वटा बस बगाएको छ । आज बिहान करिब साढे ३ बजे तिर चितवनको भरतपुर महानगरपालिका वडा नम्बर २९ सिमलताल भन्ने स्थानमा पहिरोले दुई वटा बस बगाएको हो ।
विरगन्जबाट काठमाडौं जादै गरेको बस बगाएको जिल्ला प्रहरी कार्यालयले जानकारी दिएको छ । प्रहरीका अनुसार बसमा २२ यात्रु सवार थिए ।
त्यस्तै काठमाडौंबाट गौर जाँदै गरेको गणपति डिलक्स लेखेको बस पनि पहिरोले बगाएको प्रहरीले जनाएको छ । सो बसमा ४२ यात्रु रहेको अनुमान छ ।
बस बगाएको खबर लगत्तै ठूलो संख्यामा सुरक्षाकर्मी परिचालन गरिएको छ । पहिरोले बगाएका दुईवटै बस नारायणी नदीमा बेपत्ता भएको बताईएको छ ।
पहिरोको कारण राजमार्गको दुई तर्फी आवागमन रोकिएको छ । हराएका दुवै बस भेटिएको छैन । सुरक्षाकर्मीको टोलीले हराएको बस खोजी गरिरहे पनि खोजी गर्न समस्या भएको छ ।
दुवै बसमा भएका करिब ६० यात्रु पनि सम्पर्कबाहिर छन् ।