काठमाडौं – नेपाली सुगम संगीत क्षेत्र पछिल्लो समय केही सुस्त देखिए पनि यस विधाका गीतहरूको दर्शकमा आकर्षण भने कायम छ। तर, सर्जक र कलाकारहरूको अनिच्छाका कारण नयाँ गीतहरू सार्वजनिक हुने क्रम घट्दै गएको छ।
यसै क्रममा, युवा सर्जक बाबु विनोदको उत्कृष्ट शब्दरचना रहेको नयाँ गीत “मिठो सन्देश” हालै मात्र सार्वजनिक भएको छ। बाबु विनोदले थोरै गीत लेखे पनि छोटो समयमा नै कुशल सर्जकको रूपमा आफूलाई स्थापित गरेका छन्। जापानमा वैदेशिक रोजगारी गरिरहेका विनोदले यसअघि पनि सुगम संगीतका उत्कृष्ट रचनाहरू पस्किसकेका छन्। उनी भन्छन्, व्यावसायिक सफलताभन्दा पनि गीत-संगीतमा योगदान दिने उद्देश्यका साथ यो गीत सार्वजनिक गरेका हुन्।
चर्चित युवा गायक करण परियारको स्वरमा रहेको यो गीतमा कृष्ण बाजुरालीले संगीत संयोजन गरेका छन्। माया प्रेमलाई विषयवस्तु बनाइएको गीतको म्युजिक भिडियोमा बिमल अधिकारी र विनु राउतको अभिनय छ भने निर्देशन प्रविन थापाले गरेका हुन्। गीतले छोटो समयमै सामाजिक सञ्जालमा सकारात्मक प्रतिक्रिया बटुलिरहेको छ।
